Beyond the Hoop 首映 / LOSCAR / 外院雙代會 / More!最新進展

 

 
2007年5月27日(星期日)晚7:30 華南農業大學教五B702、教四102
籃球DV劇《Beyond the Hoop》隆重首映
敬請期待!!!
 
我做過兩輪小攝像,海報上面有我個名……
 

 
再补充翻上個星期嘅相。
 
上個星期三,即係5月16號晚,去咗廣外校本部(宜家啲人都係叫北校區,不過我叫慣校本部)睇第二屆LOSCAR DV頒獎典禮。
 
好耐都冇去過校本部,確實好遠。
 

 
我覺得佢哋好有heart,佢哋唔係咩學院或者咩組織搞嘅頒獎禮,而係一個班嘅學生,兩年之內拍咗好多部DV,襯畢業之前搞個大show「與眾同樂」、「友福同享」(我冇打錯字)。
 
驚慄片《一個都不能少》確實精彩。個人比較中意《三年FANTASY》嗰種淡淡的憂傷。
 
詳細就睇最佳導演任非個blog介紹啦。http://hi.baidu.com/fei_sitdown
 
最佳導演任非說:「Loscar不只是一個頒獎典禮,它其實是一種精神,一種敢想敢做的精神,而且是快樂的精神,我們不但把Loscar視為對大學生活的紀念,而且希望通過它把這種精神傳承下去。外人看起來也許會說很難,一個班級的力量有限,但我們相信敢想敢做才能把一切變成可能。」
 
校園獨立創作力量不容忽視啊。《More!》將會有任非專訪,敬請期待。
 

 
18號晚,華南農業大學外國語學院第四次團員、學生代表大會,即係雙代會,完滿結束。
換屆當然唔關我事啦,因為我早就隱退咗。不過留低更加要勇氣,所以我都有去支持。
可惜,又有人唔見嘢,我陪佢去保衛處,所以又miss咗我最中意嘅「晚會之後狂影相」嗰part。
 
24號晚,啱啱退落嚟嘅學院學生會全委加多幾個人,一齊去食太郎腐敗一下。
我——就唔係全委,不過我都有份喎。哈哈哈。
 
之後6個玩得之人去咗通宵K。我唱足一晚,未瞓過。
 

 
講翻最重要嗰part——《More!》。
同Giby爭論咗兩個幾鐘。大家都係為咗件事啫。係有意義嘅。
去咗印刷廠,一大堆名詞——出血位、加UV、正度、大度…@¥#%¥&&#¥%……#¥%
即係排版仲要改下。 
聯絡多兩部DV劇。
 
開始聯絡其它嘢喇。聯絡媒體有啲進展,寄賣就有啲阻滯……
不過繼續大步向前,GO GO GO!!!
 
25號,同樣是《More!》駐北京記者大豬頭生日。生日快樂!!!!!
 
 
 

a month later

廣州暴雨
中午 教一 地鐵站 濕曬
購書中心 等
體育中心 雨漸大
 
心情差究竟係因為天氣定係其它呢?
心情差打個電話畀自己,聽下彩鈴。
《我想你的快樂是因為我》、《專屬天使》已經聽不到,換來嘅係「您撥打的電話已啟用中國移動全球傳信服務」。
自己嘅電話冇電
 
一個月之後見
 
 

Cover shooting – More!「氣球人計劃」




好多人都睇過模擬封面,冇錯,係某一次我同Giby嘅自拍跳起嗰張相。模擬即係唔係真嘅,莫非我真係「票房毒藥」,我做封面就會冇人買?當然,我哋要拍一個正式嘅封面。所以,就嚟到大學城廣外,喺暴曬兩個鐘頭之下搞掂咗。
 
今次唔係COVER BOY,而係有一個COVER GIRL——Chewi。唔制,我都要影多張模擬COVER。
 
留意著背心好性感呢位就係我哋嘅攝影師,俊男。個名係叫「俊南」。再配合單反相機果然夠PRO。
 
另外仲臨時拉咗「傻仔屍體」嚟做打雜,——『原來你就係Willy啊?』。
 
當然唔少得大導演Giby做策劃。
 
100個氣球最後爆凈得翻50個左右。大家終於克服咗爆氣球呢個童年陰影。
 
終於見識過廣外嘅三飯。應該叫Blacky請。
 
影咗兩百幾張相(包括花絮)。Giby有排揀。
 
仲拍埋DV,我已經諗到點剪個DV宣傳片喇。大家繼續期待一下啦。
 
下個星期要繼續完成校對同埋修改部份排版。
 
6月
More!
敬請期待!
 
 

閘波之旅

07年五一黃金週開始之前,我msn個簽名已經寫住「期待4、5、6!」。冇錯,4號自駕遊去陽江嘅閘波。不過大家注意,今次我參加嘅自駕遊唔係屋企人開車嘅「老人團」,而係一班後生仔女自己開車「向世界出發」,咁先好玩咖嘛。
 
 
8點喺廣州集中,開始奔向目的地。不過唔係好識上廣佛高速,最後都要兜到翻三元里——廣外外校校車上廣佛高速嘅地方,9點先上到。然後就全程高速——廣佛、佛開、開陽高速。有GPS,唔使驚行錯路啦。大約3個鐘頭之後,我哋已經去到閘波,就開到達目的地——東方銀灘。呢個時候,一個路牌指咗落一條小路度,莫非係捷徑?
 

 
嗱嗱嗱,呢啲就係唔信高科技,自己行捷徑嘅後果喇。因為行咗一條未通車嘅路,加上天雨路滑,部車打滑,終於獻出咗我嘅第一次——推車。三對Nike就咁冇咗,傷啊!~~~~唯有用報紙將啲鞋打包先上車啦。
 
 
去到閘波酒店,settle down前,有個摩托阿叔同我哋搭訕,想拉客去佢哋度食飯同住宿。最經典嘅一句——「呢位靚仔帶埋女朋友嚟,你哋其他人唔係諗住做電燈膽吧?今晚使唔使搵人陪啊?」救命!食飯嘅嘢唔講住,講下住先。黃金週酒店唔單只加價,500RMB一晚,而且一條毛巾加5蚊、一張被加20蚊。冇辦法啦,我哋要5P(五個人屈蛇住一間房,share翻平啲),唯有加被。
 

 
呢度就係我哋住嘅酒店喇。懸崖邊,個景色都幾靚嘎。
 

 
酒店下面就係東方銀灘,一個比較新嘅沙灘,冇咁多人冇咁多垃圾。
 

 
不過由於落雨嘅關係,唔可以「我中意同陽光玩遊戲」(請模仿林心如用粵語讀)。所以戲下水,玩一陣就翻翻酒店沖涼喇。
 
 
講翻食飯。閘波嘅名聲確實唔多好,每位去過閘波嘅親戚都同我講閘波「打死魚講價」,你指下條魚就馬上撻死佢,然後屈你七百蚊。不過今次去,我哋完全冇遇到呢種情況。聽講係因為呢種做生意嘅手法已經整衰咗閘波個名,政府干預,所以現在都唔會點屈你錢。
 

 
嗱,閘波食海鮮就非常之新鮮同好食。我哋到埗之後第一餐午餐就去咗呢個漁港後面嘅嗰間大排檔食。千祈唔好去摩托阿叔水你去嗰啲,嗰度拍烏蠅嘎。
 

 
不過我最誠意推薦嘅就係自己去農貿市場買海鮮,然後攞去附近嘅食肆加工。瀨尿蝦10蚊一斤,血甲8蚊一斤。全部都係好大隻好新鮮好正嘎。加工費先4蚊一斤。5個人都係一百幾埋單,比去周圍嘅酒樓抵食好多。
 

 
呢啲就係之前喺酒樓影嘅,其它食物,因為掛住食,所以冇影到。仲有閘波特色食品坭焗雞,其實係唔好食嘅。68一隻當然貴啦,所以冇要到,而『錢大媽酒樓』38一隻似乎好抵,不過呢間嘢係個廣告大,其它餸比較貴,所以唔推薦。
 

 
喺閘波仲係學英文嘅好地方。你哋睇——仲可以學到從句添!!!
 

 
自駕遊,最後每位盛惠RMB350,都okay啦。不過由於我打麻雀好屎,所以就咁輸咗60蚊。冇計啦,屋企人都唔打麻雀,平時少機會打。唔得,翻去要苦練下QQ麻雀先,部電腦將會迎來第一個游戲。我要快啲練好手車,下次就可以我開車,兩個司機可以去遠啲嘅好玩啲嘅地方喇。
 
住咗一晚,5號回到佛山,6號黃道吉日去祖廟還神,嘻嘻嘻!!!
 
 
%d bloggers like this: