do a good air | 做主持

 
冇錯。all of us have done a good air —— 做齣好戲(氣)。
 
The 4th English Speaking Contest of South China Agricultural University. 華南農業大學第十八屆校園文化節之英語演講比賽。
 

 

 
4月24日早上,華南地區天氣反常,落狗屎。躍進南就像變成孤島一樣。連接東區與躍進南區的華農快速幹線猶如黃河一般,水深及膝,校車拋錨。終於等到一架水陸兩棲校車,在滂沱大雨中、極不情愿的情況下到華山。
 

 

 
早上學活一邊佈置場地,主持人一邊練串場。咁我當然冇執輸,玩翻下啦。
呢兩個咁啱係佈置舞臺嘅圖案,當然係分開擺。不過擺埋一齊就……
 

 

 
7:00PM,開show。我的第一句「Tonight, we are delighted to gather here to host the 4th English Speaking Contest of South China Agricultural University」。可惜,開場前一分鐘都唔夠,先攞到啲嘉賓名單,我想即場視譯雙語廣播嘎,不過大家都話怕出錯,最後都係得中文。其實來來去去都係director, dean, chair, office of student affairs, teaching affairs office, deputy, secretary, prof. , associate,唔難。
 
一開波就發現partner讀錯,最冇舞臺經驗嘅我好似最老練咁。其實最緊張嗰個係我,因為自己係feel唔到自己出錯,不過又知道隔離錯咗……
 

 

 
平時行路都肉酸同駝背,昨晚已經盡量避免。你覺得呢?
膊頭太斜,身體太單薄。我要增肥!
 

 

 
其實全晚都大致順利。寫主持稿嘅時候,我係一句中文都唔使講。我啲國語其實唔差嘎,不過冇粵語同英文咁流利咋。到最後,頒獎的時候又有小出錯。算啦,we all have done a good air! right? sure!
 

 
時間嚟到9:45。當所有工作人員合影完畢之後。我亦回到臺下。看見時間尚早,便興奮地打了一個電話,準備坐最後一班車去深圳。於是,Willy回到收拾攝錄機。一如既往,Willy用人情向學校借機,今晚嘅主角係SONY小高清。此時,Willy問Tse同學,我嘅幹事,負責使用此小高清嘅同學:
-「機呢?」
-『喺個袋度。』
-「冇啊。」
-『唔係吧,我明明放咗喺個袋度。』
-「咁你幾時拆落嚟?有冇行開過?」
-『你哋合照嘅時候,我就拆落嚟,放咗落個袋度。行咗出去影相。』
-「有冇拉好鏈,扣好個扣?」
-『冇。』
-「有冇叫人幫你看住?」
-『冇。』
……………………
 
相信大家都知道咩事喇。有人偷咗!
 
Willy極之鬱悶,因為佢知道深圳一定去唔成。唔係去整唔見,唔使佢陪,不過都要有排煩。整呢個手續,整嗰個手續。25號煩咗一日,都未搞掂。有排煩。
 
呢個時候,Tse同學留在原位。我就急死。見到鼎爺先定翻啲。呢個時候,我終於知道,其實佢唔一定係大家口中甚至係我口中嘅冇事搵事做嘅人。確實,除咗佢,冇人可以震得住個場。
 
搞咗一輪,錄口供、打電話道歉之後。鼎爺竟然同我say sorry。我攬住佢喊咗。我前晚極度meng之際同佢argue嘅時候仲耍大牌話唔撈,講咗啲好難聽嘅嘢,今日全日都冇提翻起,叫我主持定啲嚟。呢個時候,應該我講sorry而唔係佢。So, I cried. 喺啲師妹面前冇曬形象添,好醜,唔型。
 

 
多謝大家send畀我嘅短訊。冇事喇。
 
隨後,扯咗kiki去m記宵夜。RMB7.5港式奶茶無限續杯。講翻好多嘢,佢同書記一齊之後就好耐都冇傾咁耐喇。嘩,仲有勁爆嘢!雖然佢應該一早已經知道。心情由高峰跌落谷底,跨度之大,很難承受。kiki每次都係呢個開解嘅角色。可能係佢職業規劃嘅職業病。有一個問題,我確實唔知點答。只有希望童話故事能在我身上實現。
 
朱老師話:「你哋仲係學生,仲有我可以同你撐住。第日出咗嚟社會就冇咁好彩嘎啦。我唔會畀啲學生有事嘅。」其實大家覺得朱老師呢個人點?我一直都覺得尚ok,輔導員都係打工啫。做學生工作,壓力原來係比想象中大好多。
 
不幸中之大幸,部機入面餅帶得頒獎嗰part,之前選手啲精彩演出都全部有翻。
 
要記住嘅係經驗教訓,而唔係今次嘅唔開心。
 
從拍DV,指其他人做嘢,自己又落手落腳,唔想involve落去又想do a good air,最後都做咗好多嘢,亦學咗好多嘢。
 

 
do a good air, and we did!
除咗去唔成深圳。
 
 
 
 
 


所有圖片點擊放大。照片未有經過高斯模糊處理,但有擦粉底和眼影。後臺閃光燈下看很誇張,臺上還好。
 
 
 

Advertisements

歸屬感

 
上個星期同一位仁兄食飯,講起歸屬感嘅問題。
 
準備轉新公司嘅佢,話對舊公司冇歸屬感。無論做到職位再高,都唔會有。反而對再之前嘅公司就非常之有歸屬感,不過總會有離開嘅一日。
 
當時我同佢講。我有同感。我好有同感!
 
有同感,幾個字母就可以解釋曬——ES v.s SCAU。冇錯,我諗SCAU呢幾個字母,對於我來講,即使做到職位再高,做到再風光,做到再得別人歡心,都是沒有歸屬感的。好似寫作課講Campus Activities,老師話「大學的活動有甚麼特點呢?就是比中學的活動精彩,比中學的活動豐富,比中學的活動吸引,right?」我當時好堅定咁答咗「No!」
 
我知道,喺咁樣嘅狀態下生活,會好攰。我不過由佢啦,攰都係攰多兩年,埋怨多兩年。
 
當你知道一個學院搞一個演講比賽,大部分經費唔係宣傳、唔係舞台布置、唔係獎金獎品,而係比賽當晚買畀所謂學校領導嘅鮮花嘅時候;當你知道呢個演講比賽拉翻嚟電子辭典嘅贊助因為現金唔夠,冇得貪污寧愿唔要嘅時候,你就唔會再對呢個地方有咩希望。
 
係,冇錯,冇希望,冇歸屬感,我都依然想搞好佢。所以我星期二會做主持,我拍咗剪咗宣傳片,我整好咗舞台音樂,我翻譯好所謂領導們的頭銜同機構,我要唔係我手下嘅宣傳部幹事將ppt模板一改再改。一係就唔好畀我involve落呢件事度,好等我唔好見到眼冤。一係就等我耍下大牌,我話要靚啲就同我整靚啲,我話要sharp啲就同我整sharp啲,我話要型啲就同我整型啲。同埋,我會毫不忌諱咁講一句,呢屆學院嘅四個主席都係廢人!
 
我見到sick嘅一系列活動嘅CI設計、見到黛玉對比呢兩年地球村、見到Harrison整嘅班風ppt、見到giby現場interview SM,我會諗係hanzen寫嘅一句——「為甚麼總是型不起來?!」
 
總是會帶著期待的心情去新公司,又興奮又緊張,未出發先興奮。希望我有朝一日,帶著感激嘅心情離開SCAU呢四個英文字,同時又興奮又緊張咁去一個新地方繼續學業。
 

 
今日考專四,應該會順利pass吧。TEM4呢嘅藉口唔可以再用喇,我係要開始忙定係開始抽身呢?從社聯中抽身,同瓜瓜、釗哥仔佢哋仲維持到好好嘅關係確實唔錯。
 

 
今日我哋學校都搞開放日,美食廣場+導游巴士,直接導致等校巴時間幾何級數增加!
同時想抓住滿面笑容相當滿意嘅家長同考生大叫「報華農你會後悔嘎!唔好睇唔開啊!」
 
Q.舊年嘅開放日我喺邊?
A1.舊年好似冇華農開放日。
A2.舊年我去咗廣外地球村。
 

 

 
鍵盤壞咗幾日,今日老竇送個新嘅嚟。羅技(Lo記?)唔錯,不過我覺得貴咗啲。最近想慳家。
之前個鍵盤壞咗嘅原因,係因為冇戴套有整咗啲液體落去,搞到出咗事。
呢個新鍵盤一開波當然好好愛惜,不過戴住個套嚟打——字,確實好唔舒服。
 

 

 
上個星期五,《南方的天空》預告片首映禮。(預告片都搞首映禮,米話唔大陣仗。)華農出動專業高清器材拍攝的校園DV劇。當時我真心地鼓掌,真心地為劇組人員而喝彩。我知道他們收到官方限制,我知道他們開心過哭過,我知道他們最終會因此而自豪。我會期待6月份的公映,到時首映禮我一定參加!寒假因為上口譯而不能參與,確實非常遺憾。不過既然上咗口譯課,就要努力考翻個口譯證。同時希望下次可以有機會參與DV拍攝。
 

 
《南方的天空》官方網站 http://1.stdcb.com/southernsky/index.html
《南方的天空》宣傳片 and 網絡媒體支持——紅滿堂,華農官方學生門戶 http://hometown.scau.edu.cn/
 
 

 
 
最近心情一般。可能係唔抵得某兩個人好甜蜜,又唔抵得某人日日放假咁得閒都唔搵下我。
 
心情唔好點算?
 
打下自己個電話聽翻某人送畀我嘅彩鈴
——「我想你的快樂是因為我,這是一種驕傲的美麗。只要我對你眨眨眼,你就微笑。你會思考我說的每句話,期待一個確定的回答。」
洛克班《我想你的快樂是因為我》。呢個歌詞講嘅嘢,講得好啱,確實如此。歡迎致電613441收聽。同時,最近我都慢慢細味《油畫裡的情人節》by小柯,好似描寫緊一個人,唔係我話嘅,所以更加會聽多啲,發現有一啲特別嘅感覺。我會思考你說的每一句話?
 
 
 

英語演講比賽2007宣傳片之西點屋少年勁RAP篇

鍵盤壞咗 打唔到字 稍後更新文字

有啲想去熱愛生活嘅衝動

 
最近嘅生活…………
好似全世界都為TEM4奮斗 不過我又冇喎
所以都唔知點算
學咗咁多年英文 英文依然係咁水
唉~
 
宿舍唔知邊個用互聯星空 扣多好多錢
搵人姦咗佢!
 
呢個weekend繼續拍籃球戲
演講比賽宣傳片 聽日開拍
除咗做監制之外 仲會出演主角 哈哈
 
罕有地好耐冇更新
搵翻電腦啲相出嚟
 

 

呢個係測試。絕對係相機功能嘅測試!
 

 

話說某一晚大停電 氣氛比較恐怖
校道上好靜
又好似『BR大逃殺』?定係仲要恐怖啲嘅事件?
 

 

最近陽光充沛 可以著短褲show leg
極度貧困之下look咭買izzue
盛惠5折之後RMB140 下個月還錢畀銀行
member card冇得折上折 不過可以積分
 

 

呢張係兩個星期之前影嘅
確實係好理想嘅生活狀態
 

 
是日金句——「有啲想去熱愛生活嘅衝動!」
這個星期有所期待
期待TEM-4
期待偶像回歸廣州
我等你啊!
 
 
 

Beyond the Hoop

今個星期講d乜?就講上個星期六(07年3月31日),拍DV劇——Beyond the Hoop
 
唔知點解,就識咗陳文晉,即係導演,仲無啦啦過去幫手拍DV。
 

嗱,犀利喇,呢齣係一部講述籃球嘅校園DV劇。好幸運咁識到陳文晉同埋劇組嘅人,等我有機會參與下呢個劇。原來佢哋從舊年暑假已經開始籌備兼開工,已經拍咗70%~80%。今日仲好大陣容咁租咗學校嘅體育館,動用超過70個有名有姓的臨時演員,4部攝影機多角度再加吊臂拍攝。其中一部係CANON高清XH G1,當然係借翻嚟;再加上我問學校借嘅Panasonic 180;另外有兩部手提DV。而吊臂更加係佢哋自己整嘅。資金有限又想有好效果,self made係最鍛煉人最能發揮創意的方法。
 

不過老實講,我自問冇乜拍電影的經驗,所以,取景同角度有待提高。比賽場面,參考下《男兒當入樽》。不過最後都係追住個波嚟拍。
 

最後同導演一齊睇翻PLAYBACK。當然,比預計進度慢都係正常嘅。遲d要補拍。
 
導演自編自導自演,包括比賽場面,真犀利。我啲剪片技術就有待提高喇,我要學下用premiere、Vegas啲插件,同埋將photoshop、After Effect結合嚟用。等我都構思下個節目,訪問下佢哋先。各位獨立創作人,加油!!!
 
以下劇照係來自導演陳文晉個BLOG。宣傳片已經出咗,有興趣就問佢攞啦。

導演好有心機 因爲拍攝器材係家用DV 做唔到景深效果
所以佢有d畫面 例如兩個女角出場的畫面 係逐幀逐幀勾出來 然後把背景模糊
真係非常之佩服佢有咁好耐心

%d bloggers like this: