長隆!!!

Let’s Go Camping – Chet Lam
Be a good boy for a whole week
Stuck in the car, sardined on the streets
Summer’s here, bodies in heat
You know what I mean

Pack some hot dogs, we need some meat
To do the hard work, to make us complete
Summer’s here, everything’s in heat
Let’s give us a treat

It’s time for me to have some fun
Just some causal fun
Don’t have to ask no one
It’s time for you to have some fun
It’s gonna be a blast
Don’t be shy just… come

Let’s get started, hop off the truck
Pitch a tent, unload some stuff
The flap is down, just the two of us…
Let’s keep out the bugs

 
  要帶著愉悅的心情出遊,即使安排不周都要保持心情的愉悅。
  十環過山車,破健力士世界紀錄;龍捲風暴;摩托過山車;U型滑板;叢林漂流;超級大擺錘,哇,超過180度,40幾米高。雖然每個項目都要排一個鐘,不過依然要帶著愉悅的心情出遊。仲有時間玩多次十環過山車,夜晚玩過山車,更加好玩。
  總之,昨日好開心。

p.s 昨日在長隆見到無綫電視駐廣州記者彭國柱。真人同我差唔多高,比我大隻,暗肥,皮膚比上鏡差。
  我對無綫新聞有興趣,對tvb支咪有興趣。but佢昨日唔係去採訪,所以冇好衝動咁衝上去影相。不過撞見幾次,就偷偷地影咗喇。最左邊嗰張唔係長隆,而係年初五五無綫新聞的截圖,採訪廣州人年初五去黃大仙時候的做扒相。

放大,請點擊以下兩個link:
Advertisements

豬年大吉!!!

恭喜发财!祝大家豬年
身體健康 學業進步 工作順利
豬事大吉 步步高升 日日桃花

on Willy
Coat: Special Blend (Aus) – RMB288 @ 天河南One2Free後面第一間, Canton
Shirt: NY:Crew – RMB168 @ NYC, 3rd Sun Yat-sen Road, Canton
Jeans: Levi’s EJ – RMB360 @ TeeMall Outlet(7/F), Canton
Shoes: Nike Air Force 1 – HK$499 @ King Wah Centre, Mong Kok, HK

大年初四
 
  年初四,瞓一覺之後已經冇發燒喇。某人從廣州大駕光臨,我當然熱情接待啦。仲要行成兩條街先買到…………
  廣州人嚟佛山拜年,一般都會順便入下去佛山祖廟拜神,聽聞入佛山祖廟拜北帝幾靈嘎。我雖然身為佛山人,不過並唔係每年新年都入去。好喇,佛山祖廟確係唔錯,入面保存d古色古香嘢都幾靚嘎。不過d人更加識做生意。20蚊門票,找錢全部找硬幣,美其名曰「入去之後唔使唱散紙就可以直接攞嚟啶龜」。咁入到祖廟又確實需要一毫子硬幣啶龜啶其它嘢嘅。喺祖廟又順便行下去黃飛鴻紀念館。嗱,聽聞對住隻龜個頭啶會好d:

 
  祖廟之後就去到佛山大明星電影城。佛山睇電影比廣州平成半,有學生証就更平。於是,今日有《門徒》,吳彥祖,正!齣戲以1995年真實個案改編,不過95年有sim卡手機?95年有八達通?95年地鐵有普通話報站?原來係改編,成個故事base on 21世紀。呢齣電影,確實唔錯。貌似冇乜高潮,不過又一直令你好緊張。張靜初的演技令你驚喜。值得推薦。[Link搜狐娛樂-門徒]http://yule.sohu.com/s2007/mentu/
 
  最後dinner就去咗百花六樓食壽司。呢間嘢唔錯嘎,又比較平(平過大禾,冇錯,佛山有大禾)。28蚊三文魚刺身,30蚊北極貝刺身。wasabi通鼻塞,真有感冒嘅我心。
 
  dinner之後行過去祖廟路玫瑰商場2樓睇下izzue。雖然佛山izzue我只去過一次未買過嘢,不過今次一去竟然大爲震驚。原本一part專賣變成兩個好似垃圾崗咁嘅柜。竟然淪落到如此地步,咁確實佛山消費力又唔高,呢度款色又唔夠廣州多,更加唔夠香港多,d人都唔會喺佛山買。不過瀕臨執笠全場3.5折確實幾有吸引力,就咁就買咗條短褲。


大年初三
 
  大年初三,完成所有拜年任務。不過發燒了。37度4,小小感冒。新年發燒,證明豬年一定有得發。仲有冇得高呢?

大年初二
 
  大年初二,照樣翻鄉下(離屋企十分鐘車程嘅鄉下),今年轉移到一間countryside style的豪宅,不過依然覺得係成班cheap人暴發戶。今年開始有人問我幾時結婚,頂!黐線,班八公八婆暴發戶。中午班人隊酒,舅父屎到兩杯仔紅酒就快唔掂,仲要外甥我幫手頂酒,真係唔係路。紅酒之嘛,當水咁飲咗成杯啦…………
  晚上先係氣肉,今晚開年飯比較特別。2007年農曆年初二,爺爺嫲嫲結婚50週年紀念啊!金婚快樂!嗱,呢啲就叫做『執子之手,與子偕老』喇。爺爺嫲嫲第一次切蛋糕喎,仲接受咗《威利飯局》專訪(真係有用DV拍低嘎),講述從拍拖到結婚生仔到相處五十年嘅心路歷程。仲有當然唔少得全家福啦。

  原來以前拍拖要組織批准嘎,果然係光榮的共產黨員。原來當年結婚申請唔到假期,80幾蚊人工(我爺爺算高人工嘎喇)就擺咗三圍酒,每圍30幾蚊。嫲嫲仲向我哋complain爺爺唔夠浪漫添。
  SO SWEET!~~~~~~~~~~50週年金婚始終唔肯影婚紗相,下次鑽石婚(60週年)、白金婚(70週年)、金剛石婚(75週年)、橡樹婚(80週年)嘅時候一定要影下婚紗相,再將呢集《威利飯局》攞出嚟播。

大年初一

 
  大年初一每年都係一樣嘅節目,我哋三口之家同往年一樣都係最遲先到,差不多12點先出門口。
  一早(其實應該差不多11點,不過我未起身)就收到美國三藩市伯父嘅長途電話。佢哋啱啱食完團年飯就打過嚟,同daddy煲咗半個鐘,都係問候下,講下近況,叫我哋有時間去美國玩順便探下佢哋。不過仲有以下呢句——「嚟美國讀書啦!考全額獎學金嚟美國讀書啦,讀一兩年有獎學金唔係太貴。」嘩,壓力啊。考到都已經好叻,考到獎學金就更加叻,仲要全額就更加……不過問題係我考到都先算啦,我夠知攞到全額獎學金之後唔係好貴咯。
 
  出門口之前就收到DADDY MUMMY嘅大利是。嘩,今年呢封特別大喎。算你啦,過年新衫我自己pay,哈哈。不過大利是確實有壓力。豬年要衝刺喇,開始計劃下大學後期同埋further study。
  可能今年股市大升,大家都賺咗錢,利是亦都有加碼。年初一坐底有10封大銀碼,嘩,軍姨嗰封勁啊!
  希望可以好似溫總咁講,分享到經濟增長的成果。股市升咁多 希望利是都多d。
 
  下午除咗睇賀嵗盃之外就冇乜節目(其實每年都唔係睇,淨係開住部電視),翻公公婆婆度抄d舊相。我公公後生嗰陣去德國開會嘅相真係好有型啊!去到邊都咁有領導風範。媽咪就不嬲都咁靚,小學時候嘅就已經好靚。軍姨丑小鴨變天鵝之前d相真係幾不堪入目,舅父都曾經有過瘦嘅時候,代表單位攞佛山足球冠軍,犀利!

  無驚無險又到dinner,舉家11口驅車到順德,諗住冇咁多人。點知,齋泊車就用咗超過半個鐘。好彩,兩條魚質素幾高。
  晚上,一家三口全家福。一如往年。不過連giby都話我屋企今年棵桃花細好多。算啦,唔需要大桃花喇,之前10年嘅大桃花已經bank夠,呵呵~~~~~~~~~

年三十·除夕
 
  年廿九深夜先將學校的行李大遷徙翻屋企,翻到嚟已經過咗12點。然後砌翻部腦,整下呢樣整下其它,瞓覺,一覺瞓到第二日1點。起身食d嘢再執下屋就已經要準備出門口食團年飯。
  我屋企團年飯係同爺爺嫲嫲公公婆婆舅父妗母一齊食嘅,怪吧?一般啦。
  團年飯之後就急急腳買件衫,因爲過年新衫得一件,件褸貌似太熱,所以誇張地買咗兩件短袖新衫,等過年幾日都有新衫著。
  下一個目的地就係行花街。年廿七(2.14)西湖路花市未正式開,所以冇行。而我當然知道花市係開3日,不過佛山的傳統係年廿七都有部分攤檔開始做生意,所以俾人問我「你咁都唔知,係唔係廣州人啊?」嘅時候,我惟有大大聲答「唔係」,雖然07年係我廣佛雙成記的第八個年頭。過路過花市途中鞋店瘋狂最後勁減,於是daddy mummy兩老就瘋狂最後勁買,真誇張。好啦,花市花市,行下會好運。不過正如某人所講,狗年已經好好運,所以唔好叫「轉」運,應該係加強運勢。
  finally都冇去成海豬(海珠區)花市。WHAT A SHAME。原本諗住同瓜瓜去騷擾下某sick,算啦。sick,下次先啦。
  p.s 所謂舉國關注的CCTV《春節聯歡晚會》,當然按照廣東人的傳統ignor佢。全國最垃圾的節目,自小都沒有看過一年,20年來加起來都不夠半小時。我寧願看TVB年年如是,repeat又repeat,翻炒又翻炒的「修哥扮財神派利是」,順便睇下自己豬年運程。
 
 

年三十 放假喇!

聼日就過年喇
好似好快咁
話説我破天荒咁勤奮 參加d乜interpreting training course 一直上課上到年廿八
叫做有收穫嘅
終于可以叫做正式放假喇
不過有得必有失
好似大家的聚會我都冇去成
就快過年
今晚再補充d相
 
 
 

情人節快樂

本人真跡
but用電腦寫字有點醜

威利飯局

 

2月4日中午
飛的到越名苑訪問大忙人大明星SickSick,又名色色、肥史
而呢位第二次上雜誌的飛魚王子 唔肯同本人合照
 
某電視台抄襲本台《威利飯局》的節目《志雲飯局》的開場白如是説:
假如人生係一場飯局
約咩人 點咩菜
由我發板 由我策劃
我一定會好揀擇
除咗滿足口服之用
能夠天南地北 夾雜甜酸苦辣
有交流 有感動
先至係令人一再回味嘅飯局
 
其實今次訪問 自己對自己有d失望
雖然採訪稿一早已近寫好
訪問嘉賓都好熟悉
不過問起上嚟就好似填form咁太機械
 
自己經驗尚淺
又或者有些隔閡
又或者我哋閲歷根本未夠
令訪問未能天南地北 未能甜酸苦辣
感動、交流 或者深夜時分傾msn嘅時候先有火花
 
訪問
話咁易咩?無論文字、電視都係
雖然陳志雲出鏡之後好似冇韋家晴嗰份神秘
又加上總經理的小小架子
不過 《志雲飯局》的確好成功
其實每個訪問節目 一d都唔容易
你估仲係當年高二 04年上電視吹下台灣大選求其問下老師咩?
 
關於SickSick專訪
敬請期待
請留意本網誌公告
 

%d bloggers like this: